BP gələn il Azərbaycanda dənizdə və quruda olmaqla 4 kəşfiyyat quyusu qazacaq

0
90

BP 2019-cu ildə Azərbaycanda dənizdə və quruda olmaqla 4 kəşfiyyat quyusu qazacaq.

Bu barədə “BP Azerbaijan” şirkətinin əlaqələr, xarici işlər və strategiya üzrə vitse-prezidenti Bəxtiyar Aslanbəyli deyib.

“Şirkət gələn il Xəzər dənizinin Azərbaycan sektorundakı “Şəfəq-Asiman” strukturunda ilk kəşfiyyat quyusunu qazmağı planlaşdırır. Həmçinin 2019-cu ilin ikinci yarısında “Qobustan” perspektiv strukturunda geoloji-kəşfiyyat quyusu qazılacaq. BP Abşeron yarımadasının dayazsulu hissəsində 3 perspektiv ərazidə kəşfiyyat quyuları qazacaq. Bu quyulardan ikisinin gələn il qazılması nəzərdə tutulur”, – deyə B.Aslanbəyli əlavə edib.

Qeyd edək ki, “Şəfəq-Asiman” bloku Bakıdan təxminən 125 kilometr (78 mil) cənub-şərqdə yerləşir və təxminən 1100 kvadrat kilometr ərazini əhatə edir. Bu dəniz blokunda indiyədək heç bir geoloji-kəşfiyyat işi aparılmayıb. Blok dənizin dərinsulu hissəsində suyun dərinliyinin təxminən 650-800 metr olduğu bir ərazidə yerləşir və kollektorun dərinliyi təxminən 7000 metrdir.

BP şirkəti bir müddət əvvəl Azərbaycanda mövcud “Qobustan” hasilatın pay bölgüsü sazişində 61 faiz iştirak payı əldə edib. Bu sövdələşmənin bir hissəsi olaraq BP həmin müqavilə sahəsində daha dərin layların potensialını qiymətləndirmək məqsədilə bir geoloji-kəşfiyyat quyusu qazacaq və həmin əməliyyatların operatoru olacaq.

2014-cü il dekabr ayının sonlarında isə SOCAR və BP arasında Xəzər dənizinin Azərbaycan sektorunda, Abşeron yarımadasının ətrafındakı dayazsulu sahədə yerləşən potensial perspektiv strukturlarda birgə geoloji kəşfiyyat işlərinin aparılması və işlənmə haqqında Hasilatın Pay Bölgüsü Sazişi imzalanıb. 2015-ci il aprelin 14-də Azərbaycan Respublikasının Milli Məclisi bu sazişi ratifikasiya edib. Həmin saziş Azərbaycan Hökumətinin Xəzərin milli sektorundakı bütün dəniz ərazilərinin tam tədqiq olunması ilə bağlı planının bir hissəsidir.

Hasilatın Pay Bölgüsü Sazişi üzrə kontrakt sahəsi Xəzər hövzəsinin hüdudları boyunca Abşeron yarımadasının cənubuna doğru uzanır. Həmin ərazidə suyun dərinliyi 40 metrədək dəyişir və potensial məhsuldar layın (kollektorun) dərinliyi 3000-5000 metr təşkil edir. Bu, BP şirkətinə dünyanın başqa yerlərindəki digər dayazsulu ərazilərdə qazandığı təcrübəsini və qabaqcıl texnoloji həllərini bu əraziyə gətirməyə imkan verir. Sazişə əsasən “BP Eksploreyşn (Kaspian Si) Ltd” şirkəti əməliyyatçı olmaqla müqavilədə 50 faiz paya və SOCAR isə qalan 50 faiz paya malikdir.

 

BIR CAVAB YAZIN

Rəyinizi paylaşın
Zəhmət olmasa adınızı daxil edin